10 Dane Yusup Ngampurayang Para Semetonnyane
10
Risampune masan sayahe punika liwat,
dane Israel lan soroh sentanannyane meneng ring Mesir.
Irika ipun sami ngangsan sugih tur madue sentana akeh pisan.
Kaceritayang mangkin,
dane Israel kari maurip malih pitulas tiban ring Mesir,
kantos ipun mayusa satus petang dasa pitu (147) tiban.
Tatkala dane marasa sampun nampek galah danene jagi padem,
dane ngamanggil dane Yusup.
Raris dane Israel mapangidih mangdane dane Yusup masumpah,
ritatkala dane Israel padem,
sawan danene kabakta ka negeri anak Yahudine tur kapendem ring kuburan para leluhurnyane.
Kuburane punika marupa gua sane mresidayang kabukak.
Tur irika sampun kagenahang sawan leluhur dane Israele.
Irika raris dane Yusup matur sekadi puniki,
“Tiang jagi nglaksanayang napi ja sane nikain bapa.”
Punika mawinan dane Israel ngaturang bakti kapining Sang Hyang Tunggal ring genah pasarean danene.
Nah kaceritayang mangkin,
tandina dane Israel ngamanggil okan-okan danene.
Raris dane Israel mabesen malih mangdane sawan danene kabakta ka negeri anak Yahudi tur kapendem ring kuburan para leluhurnyane.
Risampune mabesen sapunika,
raris dane Israel ngebahang deweknyane ring genah pasarean danene raris dane padem.
Raris dane Yusup ngelut bapannyane saha nangis lan niman muan bapannyane.
Raris dane Yusup mrentahang mangda sawan dane Israele kaprateka antuk wawangian.
Indike punika kalaksanayang kantos petang dasa rahina.
Lan anak Mesire nangisin dane Israel kantos pitung dasa rahina.
Risampune sapunika,
raris dane Yusup tangkil ring sang raja Mesire.
Dane nunas mangdane dane kicen galah jagi luas mendem bapan danene ring negeri anak Yahudi.
Raris sang raja Mesir ngicenin galah kapining dane Yusup mangda luas mendem bapan danene.
Dane Yusup luas ka negeri anak Yahudine sareng para semeton danene lan para soroh sentanan bapan danene.
Tur sekancan pengede raja Mesire,
para penglingsir lan para pegawe sane wenten ring purin raja Mesire,
nyarengin dane.
Lan pada sareng para prajurit sane negakin kreta miwah jaran,
luas mrika.
Akeh pisan anake sane nyarengin dane Yusup ring upacara mendem bapan danene.
Risampune rauh ring negeri anak Yahudine,
dane Yusup makarya upacara matatangisan kantos pitung rahina suennyane.
Risampune kenten,
dane Israel kapendem ring kuburan para leluhurnyane.
Sasampune puput upacarane punika,
raris dane Yusup tur sekancan para semetonnyane miwah anak Mesire,
samian pada mawali malih ka Mesir.
Nah kaceritayang mangkin,
risampune sekancan paindikane punika,
para semeton dane Yusupe pada jejeh kapining dane.
Ipun sami pada ngraos,
“Kenkenke panadine yening Yusup ngwales parilaksanan iragane ane kabuat iraga tekening ia ipidan?”
Raris ipun sami ngutus anak mangda nekedang pabesen ring dane Yusup sekadi puniki,
“Sadereng i bapa padem,
i bapa nunden tiang sami ngraosang sapuniki,
‘Ampurayang ja kapelihan belin-belin ragane ane suba malaksana jaat tekening ragane ipidan.’
Tiang makejang nyembah Sang Hyang Tunggal sane kasembah olih i bapa.
Ane jani tiang makejang mapangidih,
ampurayang ja sekancan kapelihan tiange makejang ane suba laksanayang tiang ipidan.”
Ritatkala dane Yusup mirengin pabesene punika,
raris dane Yusup nangis.
Raris para semeton danene tangkil ring dane Yusup tur nyembah kantos muannyane nganteg ka tanahe saha matur sekadi puniki,
“Tiang makejang tuah panjak ragane.”
Nanging dane Yusup ngraos sapuniki,
“Eda ja jejeh,
krana tiang tusing ja Sang Hyang Tunggal ane bakal ngadilin ragane.
Mula saja ragane makejang suba pada adung malaksana jaat tekening tiang,
sakewala Sang Hyang Tunggal ngubah unduke ane jaat ento dadi melah.
Tatujone apang anake liu kaslametang,
buka ane jani ene.
Eda ja ragane sengsaya,
tiang bakal nanggung dadaaran ragane makejang tur saluirin pianak lan cucun ragane.”
Kadi asapunika dane Yusup negdegang manah para semetonnyane.
Duk punika dane Yusup lan soroh sentanan dane Israele tetep meneng ring Mesir.
Tandina dane Yusup ngraos kapining para semeton danene sekadi puniki,
“Galah tiange jagi padem sampun nampek.
Nanging Sang Hyang Tunggal jagi miara ragane makejang.
Tur Ida jagi nuntun ragane pesu uling negerine puniki,
nuju negeri sane sampun kajanjiang olih Ida antuk sumpah kapining para leluhur iragane inggih punika dane Abraham,
dane Isak lan dane Israel.”
Nah kaceritayang mangkin,
dane Yusup padem tatkala mayusa satus dasa (110) tiban.